आटपाडीत 'नोटांचा ओढा', नागरिकांचा 'नोटांचा धुव्वा'!

 

आटपाडी -  आटपाडीच्या ओढ्यातील पाण्याने ऐन दिवाळीच्या तोंडावर स्थानिकांना ‘पाचशेचा धुव्वा’ दिला आहे. पाचशेच्या नोटा पाण्यात वाहत असल्याचे दृश्य दिसताच, नागरिकांनी या 'आर्थिक पुराचा' लाभ घ्यायला धाव घेतली. काहींनी तर पाण्याचं भान न ठेवता  थेट ओढ्यातच उडी मारली. काय, एवढ्या पाचशेच्या नोटा कुठून आल्या, याचं उत्तर कुणाकडेच नाही. मात्र, ही 'नोटांची लाट' पाहून स्थानिकांनी दिवाळीच्या खरेदीचे बेत लगेच आखले असावेत!

ओढ्यात पाचशे रुपयांच्या नोटा वाहत असल्याचं समजल्यावर आटपाडीकरांनी नोटांचा शिकार सुरू केला. बाजारहाटाचे बेत बाजूला ठेवून ‘हात धुवून घेण्यासाठी’ लोकांनी ओढ्याला गाठलं. काहींच्या नशिबाने वाऱ्यासारखा धावत येणाऱ्या या पैशाचा पुर खिशात धडकल्याचं ऐकायला मिळालं.

पोलिसांनी मात्र वेगळाच तपास सुरू केला आहे. हा चोरीचा पैसा आहे का, काही मोठं षडयंत्र आहे का, या सगळ्या शंकांचे ओझे आता पोलिसांच्या खांद्यावर आलं आहे. स्थानिकांनी मात्र तपासाच्या गोष्टीवर काही फारसं लक्ष न देता, हातात सापडलेल्या नोटांच्या रूपात दिवाळीला लक्ष्मीचं आगमन झालंय असं मानलं आहे.

विधानसभा निवडणुकीचा बिगुल वाजला असताना, आटपाडीमध्ये आधीच ‘पैशाचा ओढा’ सुरू झालाय! मतदार राजाचं दिलखुलास स्वागत करायला इथे पैसे पाण्यातून आलेत, असं म्हणायला हरकत नाही.